Муус устар 15 күнүгэр Чуукаар нэһилиэгэр СӨ култууратын үтүөлээх үлэһитэ, туйгуна, үөрэҕирии туйгуна, Гражданскай килбиэн бэлиэ хаһаайына, Ньурба улууһун, Чуукаар, Акана нэһилиэктэрин бочуоттаах олохтооҕо, самодеятельнай композитор Егор Михайлович Поликарпов сырдык аатын үйэтитэр вечер-портрет тэрилиннэ.
Бу сонун тэрээһиҥҥэ үөрэппит үөрэнээччилэрэ Дьокуускай куораттан Марианна Никифорова, Сочи куораттан Егор Пыргарь, Хаҥалас улууһуттан Юлия Кириллина куйаар ситиминэн холбонон биир дойдулаахтарын эҕэрдэлээтилэр, Егор Михайлович айбыт ырыаларын ыллаан дьиэрэһиттилэр, маны таһынан ансаамбыллара "Иэйии", "Талба", "Оскуола коллектива", тэҥҥэ үлэлээн ааспыт доҕотторо, ырыа бөлөхтөрө, атаһа Данил Филиппов уо.д.а. кыттыыны ыллылар.
Тэрээһин сценарийин уус-уран салайааччы Сэргэн Лэкээрин, өр сылларга бииргэ үлэлээбит коллегата директор Лариса Федорова тэрийэн ыыттылар. Бука бары кыттыыны ылбыт дьоммутугар дириҥ махталбытын тиэрдэбит.
Биэчэри иилээн-саҕалаан ведущийдаан ыытта олохтоох библиотека сүрүннүүр библиотекара Клавдия Андреева, музыканан киэргэттэ Елена Кириллина, уотунан-күөһүнэн киэргэттэ Екатерина Николаева, үҥкүүлэри туруорда Лариса Федорова, Раиса Николаева. 

Улуу киһибит Егор Поликарпов сырдык аата аан дойду үрдүнэн ааттана туруохтун, айбыт ырыалара уһун үйэлээх буоллуннар!