Үтүө күнүнэн ытыктабыллаах биир дойдулаахтарбыт уонна Эйгэттэн эҕэрдэ иһитиннэриини сэҥээрээччилэр!
     Эһиги болҕомтоҕутугар Чуукаартан нэдиэлэтээҕи тэттик сонуннар.
Кулун тутар 25 -26 күннэригэр доруобуйаларыгар хааччахтаах дьоннор икки ардыларыгар Дьокуускай куоракка , Автономия 100 сылыгар аналлаах остуол тенниһигэр республиканскай чемпионатка биһиги нэһилиэктэн кыттан үрдүк көрдөрүүлэри ситистилэр. Ол курдук, Саргылана Назарова дьахталларга II,Эльдар Семенов (7кыл.) оҕолорго I миэстэ буоллулар,тренер Михаил Дмитриевич Никифоров.
     Нэдиэлэ саҕаланыыта ГАУ лесресурс Нюрба тэрилтэттэн 13 киһилээх биригээдэ кэлэн нэһилиэк тула баһаартан көмүскүүр полоса оҥоруутугар үс күн үлэлээтилэр.
     Кулун тутар 26 күнүгэр, Күндээдэ бочуоттаах олохтооҕо,физическэй культура туйгуна, энтузиаст спортсмен Кононов Василий Иванович 75 үбүлүөйдээх сааһыгар аналлаах Күндээдэ нэһилиэгэр ыытыллыбыт аһаҕас дуобат турнирыгар Чуукаартан Анатолий Иванович Степанов бэйэтин оонньуур бөлөҕөр II бириистээх миэстэҕэ тигистэ.Манна Агафья Николаевна Данилова салайааччылаах 5 алын кылаас үөрэнээччилэрэ уонна Иннокентьева Айыына (6кыл),Григорьев Артем(11кыл.) баран кыттан улахан күрэҕи кытта билсэн ,кыах холонон кэллилэр.
     Дьокуускай куоракка ыытыллыбыт «Лыжня России 2022» хайыһарынан сүүрүүгэ, нэһилиэкпит оскуолатыттан 11 кылаас үөрэнээччитэ Николаев Володя, Ньурба сүүмэрдэммит хамаандатыгар киирэн кытынна.
     Оройуоҥҥа ыытыллар култуура ыйынньыгын чэрчитинэн тыа кулууптара «Культурный десант” программанан бэйэлэрин уопуттарын атастаһаллар. Кулун тутар 27 күнүгэр Чуукаардааҕы Егор Михайлович Поликарпов аатынан “Эйгэ” норуот айымньытын уонна спорт киинин үлэһиттэрэ Хорула нэһилиэгэр баран үлэлээтилэр.Программа быһыытынан Чуукаар нэһилиэгин билиһиннэрэн, нэһилиэк иистэнньэҥнэрин быыстапкатын туруордулар. Анастасия Петрова кылынан,сиэлинэн үлэлииргэ уонна кыбытыктаах тигиигэ ,Виолетта Попова тойук араастарыгар ону таһынан тыыныыны сөпкө туһаныыга, Андрей Сивцев-Лэкээрин саха төрүт дорҕоонун кылыһахха, оһуохайга таба туһаныыга маастар кылаастары оҥордулар.Киэһэтин кэнсиэрдээн олохтоохтор сэҥээриилэрин ыллылар.
     Кулун тутар 28-29 күннэригэр оройуоҥҥа норуот көҕүлээһинин сылын иитинэн “КультАрт” - култуура эдэр үлэһиттэрин маҥнайгы форума буолла. Бу ыччат үлэһиттэри түмэр, оройуон уопсастыбаннай олоҕор көҕүлүүр сыаллаах тэрээһиҥҥэ биһиги кулууппут эдэр үлэһиттэрэ көхтөөх кыттыыны ыллылар.
     Муус устар 1 күнүгэр нэһилиэккэ ыытыллар тимуровскай хамсааһын чэрчитинэн кулууп үлэһиттэрэ соҕотоҕун олорор пенсионербытыгар Татьяна Николаевна Андрееваҕа киирбит маһын саһааннаатыбыт.

Иһитиннэриини бэлэмнээтэ Надежда Казакова.