Эйгэттэн эҕэрдэ. Сонуннар. Биллэриилэр

     Кулун тутар 20 күнүгэр Чуукаардааҕы “Арчы” маҕаһыын хаһаайына, предприниматель Владимир Семенович Егоров, кэнники кэккэ сылларга үгэскэ кубулуйбут сүүйүүлээх оонньуута буолла.Манна өрүү да буоларыныы сүрүннээн сыл иһигэр сыаналаах миэбэл,бытовой техникэ,тутуу матырыйаала ылбыт атыылаһааччылар нүөмэр талан оонньууга кытталлар.
Быйылгы сүрүн бириис - аныгы өҥнөөх тэлэбииһэри , биир дойдулаахпыт Назарова Аграфена Николаевна сүүйэн Аан дойдутааҕы дьол күнүгэр бэйэтигэр бадаарак оҥоһунна.Маны таһынан куулунан ириис куруппа,саахар,бурдук оонньонон сүүйүүлээхтэргэ соһуччу үөрүү буолла.
  Бу күн, Ньурба куоратыгар оройуоннааҕы биатлон күрэҕэр спорт киинин тренера Юрий Иванов көҕүлээһининэн Чуукаартан түөрт киһи , бу сонун күрэххэ кытыннылар. Түмүккэ Николаев Владимир(11кыл.) II, Юрий Иванов III, кыргыттарга Вилена Николаева(9кыл.)III бириистээх миэстэлэргэ тигистилэр.
   Кулун тутар 21 күнүгэр Ньурбаҕа ыытыллыбыт сылгыһыт күнүгэр аналлах республиканскай тэрээһин иитинэн “Кыталык” култуура дыбарыаһыгар буолбут
“Күн Дьөһөгөй кэрэ бэлэҕэ” - сиэлтэн кылтан оҥоһуктар уонна ат толору киэргэллэрин быыстапкатыгар биһиги нэһилиэктэн  Андреева Татьяна Николаевна, Алексеева Мария Федотовна үлэлэрэ туран көрөөччү биһирэбилин ыллылар. Атыыланар оҥоһуктар хамаҕатык бардылар.
Маны таһынан “Сэттэ тойон мыраан томтор алгыһынан” диэн, кулууп үлэһиттэрэ хомуйан оҥорбут арчы наборун биир дойдулаахтарбыт олус сэргээтилэр.Дойдуларын отунан-маһынан ыраастанаары ,бэлэххэ диэн ыллылар, махталларын этиннилэр.

Кулун тутар 23 күнүгэр Саха Өрөспүүбүлүкэтин Ил Түмэн Судаарыстыбаннаймунньаҕын Тутууга уонна олохтоох бэйэни салайыныы сис кэмитиэтин бэрэссэдээтэлэ Владимир Михайлович Прокопьев тэрилтэ салайааччыларын уонна нэһилиэк актыыбын кытары көрүстэ. 

   Киэһэтигэр, көрдөөх кэпсээннэр жанрдарын артыыһа Туйаара Стручкова-Огдооччуйа айар үлэтин 25 сыллаах үбүлүөйүгэр аналлаах гастролун чэрчитинэн, Чуукаарга кэнсиэрдээн олохтоохтору сэргэхситтэ.

Оскуола олоҕуттан.

   Оскуола оҕолоро төһө да каникулга олордоллор араас таһымнаах тэрээһиннэр тиһигин быспакка буолаллар.Ол курдук оскуола иһинэн биллэриллибит психологическай ыйынньык чэрчитинэн “Харысхал” аахсыйа биллэриллэн төрөппүттэр оҕолоругар дьоҕус харысхал оҥорон бэлэхтээтилэр, “Каникулу туһалаахтык” диэн хаартысканан көстүүлэр, “Ураа,каникул” диэн оскуола психологын Мартынова С.А. көҕүлээһининэн, сибиэһэй салгыҥҥа көрдөөх күрэхтэр буолан оҕолор дуоһуйа сынньанан тарҕастылар. Эбэ5э катокка мустан,хаатыҥкаҕа кэтиллэр хайыһарынан хаамыы,салаасканан илиинэн анньынан күрэхтэһии,хаарынан сыал быраҕыы уо.д.а. көрүҥнэргэ хамаанданан хайдыһан ооннььоон көрүлээтилэр.
   Маны таһынан ОГЭ.ЕГЭ туттарар кылаастарга консультациялар, куруһуоктар үлэлииллэр. 

“Роль Степана Васильева в становлении и развитии основ государственности Республики Саха (Якутия),в развитии тяжелой и золотодобыающей промышленности в ЯАССР и СССР” Саха АССР төрүттэммитэ 100 сылыгар аналлаах бүтүн Арассыыйатааҕы научно-практическай онлайн конференцияҕа, Семенова Ф.А. салайар “Позитифф” волонтерство о5о хамсааһынын бөлөҕө кыттыыны ыллылар. 
   Оскуола эр дьоно , айан суолунан нэһилиэккэ киириигэ турар “Чуукаар” стеланы кыс хаарыттан ыраастаан тулатын күртүлэр,ону таһынан соҕотоҕун олорор бэтэрээн учуутал Алексеева Л.А. тэлгэһэтин хаарын ыраастаатылар.

“Ымыычаан”оҕо уһуйаанын сонуннара

   Оройуоннааҕы үөрэҕирии салаатын оскуолаҕа киириэн иннинээҕи саастаах оҕолору иитэр-үөрэтэр отдел салайааччыта Евдокия Васильевна Кириллина кэлэн иитэр-үөрэтэр үлэ былааннарын бэрэбиэркэлээн,түмүгэр ирдэнэр былааннар барыта баалларын бэлиэтээтэ.Эбии методическай сүбэлэри биэрдэ.Бэлэмнэнии бөлөҕөр ,үрдүк категориялаах иитээччи Алексеева С.В. ыыппыт аһаҕас дьарыгар сылдьан көрдө –иһиттэ.
   Эдэр үлэһиттэр Васильева Л.В. уонна Назарова Н.Н. “Проектно-тематический подход и исследовательская деятельность в современном детском саду"- курска үөрэннилэр.
   Уһуйаан оҕолорун икки ардыгар ыытыллыбыт “Театр уонна оҕолор”, кууста кэтэхтэн күрэҕэр Серафим Кулачиков-Эллэй “ Чурум Чурумчуку”остуоруйатын туруоран кытыннылар.

Балыыһа сонуннара

   Оройуоннааҕы киин балыыһаттан специалистар кэлэн оскуола оҕолорун ыйыллыбыт сылларынан диспансеризация иитинэн көрөн сөптөөх консультациялары биэрдилэр.
   Сыл ахсын буоларыныы флюорография салаатын үлэһиттэрэ кэлэн нэһилиэнньэни түһэрииггэ икки күн үлэлээтилэр.
   Итини тэҥэ ,үс күн тиис бырааһа Филиппов С.В. кэлэн элбэх киһи тииһин эмтэттэ.
   Сыстыганнаах дьаҥ билигин да үчүгэйдик хаптайа илик.,онно эбии сезоннай тумуулааһын элбээн көрдөрүнээччи ахсаана элбэх. Ыалдьыбыт дьон утары эмтэнэн үтүөрэллэр.

Надежда Казакова