Алтынньы ый 9-10 күннэрэ Ньурба улууһун биир кытыы сытар бөһүөлэгэр, сэттэ тойон томтор мырааннаах Чулуу Чуукаар нэһилиэгэр ураты күннэр буоллулар.

Аҕам саастаахтар декадаларын түмүктээн Аҕа Дойду Улуу сэриитин кыттыылаахтарыгар уонна үлэ, тыыл фронун бэтэрээннэригэр аналлаах Чуукаар Кубалааҕар “Мантан сэриигэ барбыттара” ытык миэстэни эбэн-ситэрэн биэрэн сэрии кыттыылаахтарын ааттара-суоллара Мэҥэ тааска суруллубутун илдьэн ууран, оннун булларан силигин ситэрдилэр.

Алтынньы 10 күнүгэр норуот көҕүлээһининэн саҥардыллан тутуллубут “Николай Семенович Степанов аатынан Кыайыы болуоссатын” үөрүүлээх аһыллыыта буолла. Болуоссат аһыллыытыгар хамсык турбутунан эрдэттэн бары санитарнай ирдэбили тутуһан сиэрин-туомун кэтэхтэн устан, киинэҕэ тиһэн оҥордубут. Кыайыы болуоссатын аалай кыһыл лиэнтэтин “Чуукаар нэһилиэгэ” муниципальнай тэриллии аҕа баһылыга В.П. Степанов, “Чуукаар нэһилиэгэ” МТ дьокутаата, Ытык сүбэ чилиэнэ, Саха Өрөспүүбүлүкэтин үөрэҕириитин туйгуна В.Н.Кыппыгыров, “Егор Михайлович Поликарпов аатынан “Эйгэ” норуот айымньытын уонна спорт киинин” салайааччыта, Саха Өрөспүүбүлүкэтин култууратын туйгуна Л.С.Федорова, Николай Семенович Степанов сиэн балтыта, эдэр урбаанньыт И.И.Федорова кырыйдылар.

Нэһилиэк баһылыга Владимир Петрович күнү-дьылы аахсыбакка төрөөбүт дойду тупса сайдарын тутуһар сүҥкэн кылааттарын киллэрсибит нэһилиэк олохтоох уолаттарыгар Гаврил Сергеевка, Аким Сергеевка, Айталин Семеновка, Иван Степановка, Степан Михайловка, Тит Мартыновка, Дьулусхан Прокопьевка, Василий Босоевка махтал суруктары туттартаата.

Кыайыы болуоссатын аһыллыытын нэһилиэк олохтоохторо онлайн эрэсииминэн ютуб сырайынан көрдүлэр. Дьон-сэргэ сүргэтэ көтөҕүлүннэ, киэһэ халлаан хараҥарыыта Н.С.Степанов аатынан Кыайыы Болуоссата “Чахчы, Чулуу Чуукаардарбыт...” диэбиттии уота-күөһэ сандаарбыта көрүөхтэн кэрэ - киһи дууһатын хамсатар!   

Махтанабыт нэһилиэк бары олохтоохторугар, күүс-көмө буолбут бар дьоммутугар, нэһилиэк култуурнай-общественнай олоҕор көхтөөх кыттааччыларбытыгар.

Иһиннэриини оҥордо Лэкээрин Сэргэн Ил.