Егор Михайлович Поликарпов төрөөбүтэ 80 сыла.

   Е. М. Поликарпов 1941 сыллаахха бэс ыйын 13 күнүгэр Акана нэһилиэгэр 11 оҕолоох Поликарповтар дьиэ кэргэттэригэр 9-с оҕонон төрөөбүтэ. Кыра кылааска үөрэнэ сылдьан аан бастаан баян диэни көрөн, төгүрүк тимэхтэригэр, баян кылбачыгас лааҕар тута өйдүүн-санаалыын ылларан абылаппыта. Самоучканан баяҥҥа оонньуу үөрэммитэ. Оскуоланы бүтэрэн баран 1958-1966 сылларга дойдутугар оробуочайдаабыта. Онтон Хабаровскайдааҕы культура институтугар баянистар курстарыгар баран икки сыл үөрэнэн 1969 сыллаахха, баянист –хормейстер идэтин баһылаабыта.1967 сыллаахха Хорула кулуубугар үлэтин саҕалаабыта. Эһиилигэр Өҥөлдьө кулуубугар 1968 сыллаахха үлэлии барбыта.Онно эмиэ биир сыл үлэлээн баран Чуукаарга ананан, кэргэнинээн Христина Егоровналыын үлэлии кэлбиттэрэ. Биир уол оҕону иитэн-такайан олох киэҥ аартыгар үктэннэрбиттэрэ. Билигин Казань куоракка олорор, кэргэннээх, биир оҕолоохтор. 1969 сылтан Чуукаарга кэлиэҕиттэн, биһиги дойдубут уутун, булдун-алдын, дьонун-сэргэтин сөбүлээн иккис дойду оҥостон 50 сыл устата үлэлээбитэ, айбыта-туппута. 

   Е.М.Поликарпов 1961 сылтан мелодист, 1987 сылтан самодеятельнай композитор. 2013 сыллаахха «Село поет - село живет» айар проега СӨ культуран Гранын ылбыта.

   2016 сыллаахха «Суһум» вокальнай ансамбла народнай ааты ылбыта.

 150 ырыа автора буолар. Ордук П.Тобуруокап, Кс.Уткин, Ст.Дадаскинов, Ник.Иванов хоһоонноругар табыллан элбэх ырыа суруйбута.

  Олунньу 3 күнүгэр 2020 сыллаахха Егор Михайлович Поликарпов тыыннааҕар аата 50 сыл үлэлээбит Чуукаарын кулуубугар иҥэриллибитэ.

  Нэһилиэк, улуус, өрөспүүбүлүкэ сайдыытыгар сүҥкэн кылаатын киллэрбит ырыа аргыстаах, дорҕоон дьүөгэлээх улуу убайбытын ахтабыт, саныыбыт. 

                             Е.М.Поликарпов аатынан "Эйгэ" НАУОСК коллектива