Мин дойдум Чуукаарым киэн туттуум
Сылтан сыл сайда тур чэчирии
Ахтабыт саныыбыт мэлдьитин
Ханна да буолларбыт эйигин.

    Ханнык да кэмҥэ аҕа дойду улуу сэриитин кыттыылаахтарын, ыар түгэни ахтан санаан ааһарбыт тоҕоостоох. Сэрии…биһиги норуоппутугар аата-ахсаана биллибэт эрэйи-муҥу, кутурҕаны аҕалбыта. Ол онтон мөлүйүөнүнэн дьон: ийэлэр, огдооболор уонна тулаайахтар сүрэхтэрэ күн бүгүҥҥэ диэри ыарыынан нүөлүйэр. Кэм-кэрдии аастаҕын аайы ол тыйыс ыар сыллар биһигиттэн тэйдэр-тэйэн иһэллэр, ол эрээри эһэлэрбит уонна аҕаларбыт сэбиэскэй норуот бүттүүнүн улуу хорсун быһыылара биһиги өйбүтүгэр сүрэхпитигэр хаһан да өлбөөдүйүө суоҕа.
    Саха сирэ - улуу дойду саамай хотугу Олоҥхо дойдутун бар дьоно кыргыс толоонугар уонна тыылга кимтэн да хаалсыбакка бииргэ кыайыыны уһансыбыттара. «Бука барытын –фроҥҥа, бука бары - Кыайыыга!» диэн сирдьит олохторун сыалынан буолбута. Сылайалларын, сындалыйалларын кэрэйбэтэх сэрии уонна тыыл кыттыылаахтарын ааттара Аҕа дойдуну көмүскүүр Улуу сэрии летопиһыгар кыһыл көмүс буукубанан суруллубуттара.
 Ол курдук Саха сирин килбиэннээх буойуннара сэрии саҕаланыаҕыттан ыла Ийэ дойдубут атын норуоттарын бэрэстэбиитэллэрин кытта сарыҥ-сарыҥнарыттан өйөҥсөн сэриилэспиттэрэ, Берлиҥҥэ диэри тиийбиттэрэ, рейхстаг урусхалламмыт эркиннэригэр «Биһиги эмиэ сырыттыбыт: Саха сириттэн..» диэн бэлиэ суруктары хаалларбыттара, Япония милитаристарын үлтүрүтүспүттэрэ, сэрии ыарын бүтүннүүтүн санныларынан сүгэн туораабыттара, көһөтүүлээх Кыайыыны аҕалсыбыттара.

    Ньурба улууһун Чуукаарыттан Аҕа дойду улуу сэриитигэр 160 чулуу дьоммут кыттыыны ылбыттара, олортон 34 киһи үлэ фронугар сылдьыбыттара. Кыайыы кынаттанан 104 киһи эргиллэн кэлэннэр дойдуларын туһугар үлэлээбиттэрэ. Сыл-хонук аастаҕын аайытын хомойуох иһин уоттаах сэриигэ сылдьыбыт ытык Бэтэрээннэрбит ордубатылар. Ол эрэн биһиги кинилэр ааттарынан киэн туттабыт, үлэлэрин холобур оҥостобут. Билигин Чуукаар нэһилиэгэр 3 үлэ тыыл бэтэрээннэрэ, 16 сэрии сылын оҕолоро бааллар, кинилэр ааттарын сырдыктык тутабыт!
                                    Үлэ тыыл бэтэрээннэрэ:
Аалекеева Мария Апполоновна
Кириллин Николай Иннокентьевич
Васильева Мария Яковлевна

                                   Сэрии сылын оҕолоро:
Семенова Евдокия Егоровна
Степанов Василий Виколаевич
Кириллина Мария Николаевна
Родионова Мария Михайловна
Александрова Анна Моисеевна
Владимиров Иван Федотович
Васильев Владимир Григорьевич
Афанасьева Любовь Алексеевна
Михайлов Егор Алексеевич
Попова Анна Куприяновна
Кириллин Николай Иннокентьевич
Алексеева Мария Апполоновна
Алексеев Василий Дмитриевич
Осипов Семен Герасимович
Тимофеева Татьяна Никитична
Семенова Анна Ильинична

    Кыайыы күнэ үйэлэргэ умнуллубатын! Ким да умнуллубат, туох да умнуллубат!

     Маны сэргэ төһө да хамсык ыарыы туран Кыайыы бырааһынньыгын куйаар ситиминэн да көрүстэрбит Чуукаардааҕы Е.М.Поликарпов аатынан “Эйгэ” НАУоСК (директор Федорова Л.С.) үлэһиттэрэ куйаар ситиминэн араас элбэх тэрээһиннэри ыыталлар, сүрүн соруктара ыччат Кыайыы күнүн умнубатын туһугар дириҥ сыраларын биэрэллэр. 

Хаартыскалары сиһилии chukar_sntis инстаграм сырайыгар көрөҕүт

Иһитиннэрдэ Сэргэн Лэкээрин