"АҔА УОЛУНААН КҮРЭҔЭ"
төрүт дьарыкка олоҕуран спортивнай күөн-күрэс

     Ньурба улууһун Таркаайы нэһилиэгин Киирэп бөһүөлэгэр кулун тутар 20 күнүгэр бэрт сэргэх, интириэһинэй Эр дьон икки ардыларыгар күөн-күрэс буолан ааста.
    Күрэскэ Ньурба улууһун 10 хамаанда кытынна: Антоновка нэһилиэгиттэн Михайловтар, Ньурба куораттан Тимофеевтар, Хаҥалас нэһилиэгиттэн Никифоровтар, Марха нэһилиэгиттэн Тобоновтар, Күндээдэ нэһилиэгиттэн Петровтар, Киров бөһүөлэгиттэн Тихоновтар, Маар нэһилиэгиттэн Антоновтар, Васильевтар, Малдьаҕар нэһилиэгиттэн Саввиновтар кытыннылар.
      Бу күөн-күрэскэ Чуукаар нэһилиэгиттэн Аҕа баһылык В.П.Степанов көҕүлээһининэн "Кэнчээри" түөлбэ олохтоохторо, нэһилиэк биир бастыҥ ыаллара Дьулустан Васильевич уолунаан Юлианныын кыттан кэллилэр. Күөн-күрэс туһунан кылгастык сырдатабыт.
     Үгэскэ олоҕуран маҥнай утаа кэлбит ыалдьыттары сахалыы таҥастаах дьахталлар арчылыы көрүстүлэр, арчыланан киирбит кэннэ Үрдүкү Айыылартан алгыс ылынар сиэр-туом саҕаланна, алгыстаах алаадьынан, кыынньар кымыһынан айах күндүлээһин кэннэ бэйэни биһиннэрии түһүмэҕэ кулууп дьиэтигэр ыытылынна. Кыттааччылар бары дэгиттэр талааннаахтарын, дьиэ-кэргэн төрүт үгэһин толору арыйдылар.
      Бу кэннэ күрэс сүрүн түһүмэхтэрэ Марха эбэҕэ ыытылынна. Күөн-көрсөөччү аҕа уолунаан араас түһүмэхтэргэ бэйэлэрин кыахтарын, мындырдарын көрдөрдүлэр, ол курдук ойбон алларан, остуолбаҕа ыттан, мас хайытан, саһааннаан, дьылабыайдаан, биотлоннаан.
Таһардьа төһө да тыаллааҕын аахсыбакка нэһилиэк олохтоохторо, тэрийээччилэр кыттааччылар уонна ыалдьыттар тоҥмотуннар диэн киэҥ-куоҥ балаакка тарданнар эт миининэн, өрөһөлүү буспут этинэн кэлбит дьону барыларын буор-босхо аһаттылар.
   Күрэх долгутуулаах, кэтэһиилээх түмүгэ кулууп дьиэтигэр буолла,үһүс миэстэни ыллылар Чуукаар нэһилиэгиттэн Дьулустаан уонна Юлиан Степановтар, Степановтар дьиэ кэргэттэригэр "Чуукаар нэһилиэгэ" МТ дьаһалтата, Е.М.Поликарпов аатынан "Эйгэ" НАУоСК, Чуукаардааҕы МПЧ, "Кэнчээри" түөлбэ анал бэлэхтэри туттартаалылар. Иккис миэстэ Күндээтэ нэһилиэгиттэн Петровтар, Маҥнайгы миэстэни ылары ситистилэр Хаҥалас нэһилиэгиттэн Никифоровтар.
     Төрүт дьарыкка олоҕуран оҥоһуллубут "Аҕа уолунаан" спортивнай күөн-күрэс сыл ахсын ыытылыннын, кыттааччыта элбээн истин, Чуукаар нэһилиэгэ Чыпчаалга дабайан истин диэн алҕыы хаалабыт!

Лэкээрин Сэргэн