Төрөөбүт-үөскээбит, биһикпитин ыйаабыт, куорсун анньыммыт, кынат куурдуммут, олох киэӊ аартыгар эрэллээхтик үктэммит сирбит – ырыа5а ылламмыт, хоһооӊӊо хоһуйуллубут Чуукаар барахсан.  Хаһан да хана да сырыттарбыт солко суугунан күөгэлдьийэр күөх тыаларын, ыраахтан ыӊыра-угуйа, күн уотугар күлүмүрдүү, үрүӊ көмүһүнэн оонньуу турар ыраас күөллэрин, байанайдаах, биллибэт кистэлэӊнээх аар тай5аларын, ыалдьытымсах, эйэ5эс-сайа5ас чугас дьоммутун мэлдьи ахтабыт-саныыбыт.

       Былыргы дьыллар мындааларыттан күн бүгүӊӊэ диэри Чуукаар дьоно-сэргэтэ эмиэ да чымаан чыпчаааллардаах, хараҥа хаспахтардаах, эмиэ да дьол-соргу, үөрүү-көтүү до5уһуоллаах уһун умсугутуулаах оло5у олорон кэллэхтэрэ. Чуукаар нэһилиэгэ – быдан ыраахха диэри быралыйан бара турар, түгэ5э биллибэт дириӊ, баай историялаах, быйаӊнаах айыл5алаах, сыспай сиэллээх сыыйылла сүүрэр сыһыылардаах, адаар муостаах ааллаан киирэр ходуһалардаах, көтөр кынаттаах ууһуур-бииһиир күөллэрдээх күүстээх ураты эйгэлээх ытык сирдэртэн биирдэстэрэ буолар. Манна үгүс үтүө өйдөөх, сайдам санаалаах, күлүмэх күүстээх, айыы талааннаах, хатыламмат дьикти дьыл5алаах, бүгүҥҥү күҥҥэ диэри номоххо, үһүйээҥҥэ кэпсэнэр үтүөкэн дьон төрөөн-үөскээн, ааттарын ааттатан, суолларын-иистэрин хаалларан аастахтара...

        Сири дьоннор киэргэтэллэр... Ханнык ба5арар сир-дойду кэрэхсэнэр чулуу дьонунан киэн туттар. Чуукаар нэһилиэгэр араас сылларга ча5ылхай көрдөрүүлээх, бастыҥ өйдөөх дьоннор үөскээн-төрөөн ааспыттара, дьону-сэргэни билии-көрүү, кэрэ эйгэтигэр сирдээбиттэрэ.

        Чуукаар нэһилиэгэ - устуоруйа сайдыытын биһигэ да диэтэхпитинэ ал5аһаабаппыт буолуо. Кини кэнчээри ыччата, ытык-мааны кырдьа5астара үүнэр, кэлэр көлүөнэ5э оӊоро тураллар көӊүл олох устуоруйатын, кө5үлүү сылдьаллар сырдыгы, кэрэни, билиини, төрөөбүт төрүт дойдуга тапталы!

                                      Күндү ааҕааччыларбыт!

Бу олукка эһиги Чуукаартан төрүттээх киэҥ билии, араас билим эйгэтигэр бэйэлэрин сүҥкэн кылааттарын киллэрсибит дьоммут туһунан билсэҕит. Сиһилии хаартыскалары баттаа, онно дьоммут туһунан кылгас иһитиннэриилэр, ханнык билим дуоктардара буолаллара көстөр.